ओरालो लाग्दै महिला क्रिकेट

सिनियर पुरुष क्रिकेट टिम आइसीसी डिभिजन २ को तयारीमा व्यस्त रहेको बेला नेपाली महिला क्रिकेट टिम भने गुमनाम आवस्थामा रहेको छ | नेपालमा महिला क्रिकेट गतिविधि सुन्य रहेसंगै महिला टिमका खेलाडीहरु पनि गुमनाम दिनचर्या बिताईरहेका छन् |

नेपाल क्रिकेट संघ (क्यान)को लापरबाहीको कारण नियमित प्रतियोगिताहरु नहुदा नेपाली महिला क्रिकेट ओरालो लाग्नुका साथै राष्ट्रिय महिला क्रिकेट टिमका सदस्यहरु क्रिकेट छोड्ने सम्मको मनस्थितिमा पुगेको छ | महिला क्रिकेट गतिविधि सुन्य हुदा केहि नेपाली क्रिकेट टिमका अधिकांस खेलाडीहरु पलायन हुने सम्भावनामा बढेको छन् | केहि खेलाडीहरु अन्य विकल्पको खोजीमा रहेका छन् |

नेपाली  महिला क्रिकेट टिम ;तस्विर क्यान  

सशस्त्र प्रहरीको क्लब एपीएफ क्लबमा आबद्ध केहि खेलाडीहरु बाहेक अन्य महिला क्रिकेटरले अभ्यास समेत गरेका छैनन् | केहि खेलाडीले भने आफै सेल्फ अभ्यास गरिहरेका छन् | त्यो बाहेक महिला क्रिकेटको कुनै उपलब्धि छैन | महिला क्रिकेटरहरुले क्यानले समयमै प्रतियोगिता गरिदिए खेलाडी तथा महिला क्रिकेटको विकास हुने बताएका छन् | उनीहरु जतिसक्दो राष्ट्रिय प्रतियोगिता भएको हेर्न चाहन्छन |

नेपाली महिला क्रिकेटले छोटो समयमै अन्तर्राष्ट्रिय स्तरमा राम्रो पहिचान बनाए पनि क्यानको लापरबाहीले अहिले गुमनाम भएको तथा महिला क्रिकेट ओरालो लागेको महिला क्रिकेटरको भनाइ छ | राष्ट्रिय टिमका कप्तान समेत रहेका रुबिना छेत्रीले समेत अबको दिनमा क्यानले राम्रो योजना नल्याए महिला क्रिकेट तल झर्ने बताएकी छिन् | हाल महिला क्रिकेट सुन्य भएपछि आफ्नै जिल्लामा (झापा) मा पढाईमा व्यस्त रहेका उनले हिमालय टाइम्ससंग कुरा गर्दै  | क्यानले महिला क्रिकेट प्रतियोगिता संचालन नगर्दा महिला क्रिकेटरले आफ्नो जीविका निर्वाह गर्न अन्य बिकल्पमा जानुपर्ने अवस्था  आएको बताइन |' देशमा महिला क्रिकेट शुन्य छ, यसले गर्दा महिला क्रिकेट डाउन भएको छ | क्यानले कुनै प्रतियोगिता गर्नेबारे जानकारी अहिलेसम्म दिएको छैन | त्यसैले म यहाँ आएर आफ्नो पढाईलाई निरन्तरता दिदै छु |' उनले थपिन,'हामीले आफ्नो घरमा सेल्फ ट्रेनिङ बाहेक अन्य ट्रेनिङ गर्न पाएका छैनौ |तर केहि साथीहरु भने एपीएफ क्लबमा ट्रेनिङ गर्ने गरेका छन् | जो एपीएफ क्लबमा आबद्ध छन् |'

साथै कप्तान रुबिनाले क्यानले प्रतियोगिता नगर्दा खेलाडीलाई आर्थिक संकट आएको बताउदै क्यानले समेत राष्ट्रिय टिमका सदस्यलाई भत्ता उपलब्ध गराए राम्रो हुने बताइन |' टुर्नामेन्ट नहुदा हामीलाई आर्थिक मार पर्छ, पकेट खर्च हुदैन | त्यसकै लागिपनि केहि साथीहरु अन्य जव (काम)मा छन् | तर,क्यानले सिनियर टिमका दाइहरुलाई तलब दिन्छ, हामीलाई दिदैन | धन्न एपीएफमा आबद्ध साथीहरुले पाच हजार भएपनि पकेट खर्च पाएका छन् | नत्र क्रिकेट मात्र खेलेर कसरी बाच्नु ? अनि कसरी नेपाली क्रिकेट माथि जान्छ ? उनले प्रश्न गरिन | कप्तान रुबिनाले खेल हुनु एक महिना अगाडी क्लोज क्याममा राखेर मात्र महिला क्रिकेटको विकास नहुने भन्दै अब सरकार र क्यानले सोच्नुपर्ने बेला आएको बताइन | साथै उनले केहिदिन अघि क्यानले राष्ट्रिय प्रतियोगिता गर्न लागेको सुनेर क्यानमा जादा प्रतियोगिता सरेको बताएको बताइन | रुबिनाले क्यानले प्रतियोगिताहरु नियमित गराए क्रिकेटरलाई राम्रो हुने बताउदै खेलाडीहरुको चाहना जतिसक्दो धेरै प्रतियोगिता खेल्ने हुने समेत बताइन |

त्यस्तै राष्ट्रिय टिमका अर्का सदस्य तथा क्षेत्रिय टिम पोखराका खेलाडी आरती बिडारीले क्यानले महिला खेलाडीको लागि प्रतियोगिता नगर्दा खेलाडीहरु पलायन हुदै गएको र महिलाहरुको क्रिकेट रुची घट्दै गएको बताइन |'केटाहरुको बर्षमा २/३ टुर्नामेन्ट हुन्छ, तर हाम्रो लागि हुदैन | यसले नेपाली महिला क्रिकेटको स्तर घट्दै गएको छ | यसका लागि क्यानले बर्षमा ३/४ वटा प्रतियोगिता गरिदिए हामीजस्तो व्यक्तिगत रुचिमा क्रिकेट खेल्नेहरुको लागि राम्रो हुन्थियो | हामीलाई पैसा भन्दापनि अहिले खेल चाहिएको छ, हामीले खेलुपर्ने हुन्छ |' त्यस्तै उनले आफ्नो सेल्फ ट्रेनिङ गर्दै आएको बताउदै अझै केहि वर्ष क्रिकेटमै बिताउने तर,यस्तै भइरहेको खण्डमा अन्य बिकल्पमा जाने सोच आएको बताइन |' अब केहि वर्ष क्रिकेट मै केहि गरौ भन्ने छ, घर परिवारबाट पनि गेमहरु नहुदा किन समय बर्बाद बनाएको भन्दै भानिहरेको छ तर एक बर्ष हेर्छु यस्तै भईरहे अन्य बिकल्पमा जाने सोच छ |' साथै उनले क्यानले महिला क्रिकेटको बिकासका लागि योजना बनाए महिला क्रिकेट राम्रो हुने बताइन |

त्यस्तै राष्ट्रिय टिमका सदस्य तथा विकेट किपर मधु थापाले क्यानले राष्ट्रिय तथा अन्तर्राष्ट्रिय प्रतियोगिताबारे केहि जानकारी नदिएको बताउदै आफुहरु राष्ट्रिय टिममा भएपनि क्यानले ट्रेनिङ गर्ने व्यवस्था नगरेको बताईन |' हामीलाई क्यानले त्यसबारे केहि जानकारी दिएको छैन, हामीलाई ट्रेनिङबारे पनि केहि भनेको छैन | म चाहिँ एपीएफ क्लबमा आबद भएको कारण क्लबमै ट्रेनिङ गर्ने गर्छु |'

यता महिला खेलाडीले क्रिकेट छाडेर अन्य विकल्पमा जाने सोच बनाईरहदा क्यानले भने विभिन्न विवाद तथा समस्याको कारणले प्रतियोगिता गराउन नसकेको जनाउदै अब भने प्रतियोगिताहरुलाई निरन्तरता दिने जनाएको छ | क्यानका महासचिव उत्तम कर्माचार्यले क्यानलेको क्यालेन्डरमा महिला क्रिकेटका लागि कम प्रतियोगिताको लिस्ट रहेको र क्यानमा देखिएको विवादले गर्दा प्रतियोगिता गर्न नसकिएको बताए |' क्यानमा जुन विवाद देखियो,अख्तियार, लेखा समितिलगाएतको छानबिन प्रक्रिया लगाएतका विवादले प्रतियोगिता रोकियो | त्यसमाथि हाम्रो क्यालेन्डरमा एक मात्र प्रतियोगिता हुने छ | र,यही पुसमा हुन लागेको इन्टर स्कुल महिला क्रिकेट पनि खेलकुद मन्त्रीले क्यानको खाता रोकिदिदा गर्न सकेनौ | बल्ल खाता सुचारु भयो अब माघको अन्तिम तिर उक्त प्रतियोगिता गर्छौ |'

त्यस्तै महासचिव कर्माचार्यले महिलाको प्रतियोगिता कम भएको स्वीकार गर्दै अब क्यानले महिला क्रिकेट बिकासका लागि ठोस योजना बनाउदै अघि बढ्ने रहेको बताए |'हो महिला क्रिकेट बिकासका लागि प्रतियोगिताहरु कम भएको छ, यसले महिला क्रिकेटको विकास खास हुदैन,अब क्यानले महिला क्रिकेट बिकासमा ठोस कार्ययोजना बनाई अघि बढ्छ |' साथै उनले विभिन्न कारणले महिला क्रिकेटरलाई भत्ता दिन नसकिएको जनाउदै अबको केहि बर्षमा भने महिला क्रिकेटरले समेत भत्ता पाउने बताए |' भर्खरै बाट मात्र पुरुष सिनियर टिमले भत्ता पाउन थालेको हो, महिला क्रिकेटरलाई अहिले सम्म उपलब्ध गराएका छैनौ, तर प्रक्रिया पुर्याएर केहि वर्षपछिबाट उपलब्ध गराऊछौ |' साथै उनले जिल्लाको टिममा सहभागी नपुगेको बताउदै माघको अन्तिममा क्षेत्रिय टिम सम्मलित राष्ट्रिय प्रतियोगिता गर्ने बताए |

पुस १५ को हिमालय टाइम्समा प्रकाशित