नेपाली क्रिकेटमा पुरानो प्रवृति दोहोरिनु हुन्न

मलेसियामा बिहिबार सम्पन्न आइसीसी क्रिकेट लिग डिभिजन थ्रीको उपाधि जित्दै नेपालले क्रिकेटमा सफलताको नयाँ चिढि चढेको छ | नेपाल उपाधिसहित डिभिजन टूमा बढुवा भयो र टेस्ट नखेल्ने राष्ट्रहरुको बिचमा पुनः अब्बल टिम साबित भयो | साथै नेपालले पहिलो स्तरको क्रिकेट खेल्न पाउने सम्भावनाहरु पाएको छ |
मलेसियामा पाएको यो उपलब्धि नेपालको लागि अत्यन्तै गौरबको बिषय बनेको छ | नेपालले पाएको यो सफलतामा नेपाली क्रिकेटमा अझै राम्रो हुने संकेत मिलेको छ | जुन कुरा मलेसियामा खेलाडीहरुले प्रमाणित गरे | उक्त प्रतियोगितामा उपाधि उचाल्न नेपालका लागि पुरानो नियम तोडिदै कुनै पनि एक खेलाडीमा निर्भर हुनु परेन | नेपाली क्रिकेटमा यसपटक आफ्ना तिनवटै क्षेत्रमा सुदृढ देखियो | नेपालको सधै देखिने कमजोर ब्याटिङ्ग यसपटक उत्कृष्ट देखियो भने बलिङ् र फिल्डिंङ्मा पनि धेरै सुधार देखियो | यो नेपालको क्रिकेटका लागि सुखद सरुवात हो |
सन् १९९६ बाट अन्तर्राष्ट्रिय क्रिकेट सुरु गरेको नेपालले छोटो अवधिमा धेरै सफलताहरु पाएको छ | नेपालले यसै बर्ष टि ट्वान्टी विश्वकप खेल्यो जहाँ उत्कृष्ट प्रदर्शन गरी टि ट्वान्टी अन्तर्राष्ट्रिय मान्यता पायो | र अहिले पुन डिभिजन थ्री च्याम्पियन बन्यो | यस खालको प्रदर्शनले नेपालको अन्तर्राष्ट्रिय क्रिकेटमा प्रवेश गर्ने सम्भावना राम्रो रहेको देखाऊछ | यसरी एउटा पनि अन्तर्राष्ट्रिय स्तरको क्रिकेट मैदान नभएको नेपालमा एक पछि अर्को उपाधि दिलाउने अहम भूमिका निर्वाह गर्ने कार्य भने श्रीलंकाली प्रशिक्षकहरुले गरे | नेपाली क्रिकेटको सफलतामा जग हाल्ने काम पूर्व प्रशिक्षक  रोय लुक डायसले गरे भने त्यसमा सफलता र विकास दिने कार्य हालका प्रशिक्षक पुबुदु दासानायेकेले गरे |
अन्तर्राष्ट्रिय क्रिकेटमा नेपालले एक पछि  अर्को सफलता पाइरहदा देशमा भने क्रिकेटको बिकासमा मद्दत पुग्ने कामहरु  भएको छैन | नेपालमा अन्तर्राष्ट्रिय स्तरको मैदान छैन | निर्माणाधीन मैदान कहिले बन्ने हो त्यसको टुङ्गो लागेको छैन | अर्कातिर नेपाल क्रिकेट संघ (क्यान) आफै विरामी अवस्थामा छ | हाल क्यानको नेतृत्व कार्यवाहक छ भने यस सस्थाको १० पदाधिकारीहरु भ्रष्टाचारको मुद्दा खेपिरहेका छन् |
त्यसैले नेपाली क्रिकेट बिकासका लागि क्यान आफै बलियो हुनुपर्ने देखिन्छ | नेपाली क्रिकेटले सफलता पाउन क्रिकेटका पुरानै प्रवृति दोहोरिनु दिनु हुन्न | यस सफलतालाई निरन्तरता दिनु सक्नु पर्छ |फेरी खेलाडीहरुले बिद्रोह गर्ने, प्रशिक्षक नियुक्तिमा सरकारले बल प्रयोग गर्ने अवस्था आउन दिनु हुन्न | जुन अघिल्लो सस्करणको डिभिजन थ्री जितेर आएपछि भएको थियो | नेपाली खेलाडीहरुको स्तर उकास्नका लागि क्यानले चाडै नयाँ कार्ययोजना तयार पार्नु सक्नुपर्छ | खेलाडीका लागि नियमित तलब सुबिधा, प्रशिक्षणको लागि उचित व्यवस्था,अभ्यासका लागि राम्रा टिमसंग खेल खेलाउने व्यवस्था गर्नु पर्छ | क्यानले अहिलेका खेलाडीहरुलाई विस्थापित गर्न सक्ने नयाँ खेलाडीहरुको उत्पादनमा लाग्नुपर्ने देखिन्छ | क्रिकेट खेललाई तल्लो तहबाट विकास गरी उत्कृष्ट खेलाडी निकाल्नु जरुरि छ | जसले गर्दा क्रिकेटको सफलतालाई कायम राख्न सकियोस |
नेपालले अब चाडै नामबिबियामा जनवरीमा हुने डिभिजन टू खेल्दैछ | यहाँ नेपालले फस्ट क्लासको क्रिकेट खेल्नु सक्नुपर्ने हुन्छ | डिभिजन टूका लागि नेपालसंग लामो तयारी गर्ने समय छैन | नेपालसहित आयोजक नामबिबिया, केन्या, युगान्डा, नेदरल्याण्ड र क्यानाडा रहेको डिभिजन टूमा नेपालले आफ्नो क्षमता देखाउनु सक्नुपर्छ | जसका लागि नेपालले धेरै अभ्यास खेल खेल्न जरुरि छ | क्यानले यो उपलब्धि टिकाई राख्न अहिले नै अग्रसर हुनु पर्छ | फेरी नेपालले खेलेर हैन भाग्यको साथले जित्नु नपरोस् | यदि क्यानले आफ्नो सम्पूर्ण संयन्त्र क्रिकेट बिकासका लागि प्रयोग गरे हाम्रा खेलाडीहरुले खेलेरै जित्नेछ |
अहिलेको सफलताले नेपाली क्रिकेट जगतलाई अन्तर्राष्ट्रिय स्तरमा पुर्याउने राम्रो मौका हुन सक्छ | यो सफलता संगै नेपाली क्रिकेटले अन्तर्राष्ट्रिय क्रिकेटमा प्रवेश गर्ने धेरै सम्भावनाहरु पाएको छ | नेपालले डिभिजन टूमा राम्रो प्रदर्शन गर्दै शिर्ष दुई स्थानमा रहे आइसीसी डिभिजन वान खेल्ने अवसर पाउने छ | जुन उक्त अवसर भनेको फस्ट क्लासको क्रिकेट खेल्न पाउने अवसर हो |  नेपाल डिभिजन वानमा पुगे आइसीसी वर्ल्ड क्रिकेट लिग च्याम्पियनसिप र आइसीसी इन्टर कन्टिनेन्टल कप खेल्न पाउनेछ | जुन प्रतियोगिता भनेको वान डे क्रिकेटको मान्यता पाउने माद्यम हो | डिभिजन वानमा हङ्कङ्, आयरल्याण्ड, पपुवा नुगिनी, युएइ,स्कटल्याण्ड र अफगानिस्तान छन् |
तर, नेपालको हालको अवस्थामा नेपालले डिभिजन टूका लागि अभ्यास गर्ने समय थोरै छ | यस बिचमा नेपालले श्रीलंकामा पहिलो हङ्कङ्संग टि ट्वान्टी सिरिज खेल्ने छ | नेपालले हङ्कङ्संग नोभेम्बर १३,१४र १६ मा खेल्नेछ | जुन नेपालको पहिलो टि ट्वान्टी सिरिज हुनेछ | बंगलादेशमा भएको टि ट्वान्टी विश्वकपमा उत्कृष्ट प्रदर्शन गरेपछि नेपालले टि ट्वान्टीको मान्यता पाएको थियो | उक्त सिरिजले मात्र नेपालको खेलमा धेरै प्रगति हुदैन | नेपालले डिभिजन टूमा सफलता पाउन त्यो भन्दा बाहेक अझै धेरै अभ्यास गर्नुपर्ने देखिन्छ |
नेपाली क्रिकेटको अझै बिकास र वान डे क्रिकेटमा प्रवेशका लागि खेलाडी, प्रशिक्षकले गर्न असम्भब छ | नेपाललाई यो सफलताको सिढीमा निरन्तरता दिन नेपाल क्रिकेट संघ (क्यान) को भूमिका महत्वपुर्ण रहन्छ | त्यसका लागि क्यानले आफ्नो व्यवस्थापन सुधार्दै लैजानुपर्ने हुन्छ | क्यानले निर्माणाधीन मैदानको निर्माण चाडो सक्नु पर्ने हुन्छ | खेलाडी छान्न, उत्पादन गर्न राष्ट्रिय स्तरको खेलहरु निरन्तर खेलाउन जरुरि रहेको छ | 
नत्र, बर्मुडामा भएको अघिल्लो सस्करणको बिजेता टोली नेपाल जसरि खराब प्रदर्शन गरी डिभिजन थ्री मै झरेको थियो अहिले पुनः त्यस्तै स्थितिको शिकार नेपाली क्रिकेटमा नहोस | 

कार्तिक १५ गते हिमालय टाइम्समा प्रकाशित लेख (एडिट नगरिएको)