भूकम्प तिमी र म डिभोर्स गरौँ

तस्बीर गुगल 

प्रिय,

भूकम्प ! तिमीलाई मैले किन यति धेरै माया गरेँ र तिमीले साथ दियौ ?

हेर ! तिम्रो यो मायाले म पागल भै सकेँ । मलाई दिनमा चैन छैन अझ रातमा समेत चैन छैन | किन ? खाली तिम्रो मात्र माया लागेर आउँछ | तिम्रो यादले सताई रहन्छ | तिमी सपनीमा आउँछौ | विपनामा भने हराउँछौ |

तिमी भन्छौ होला भूकम्प , मैले तिमीलाई माया गरेको छैन भनेर होला | तर, तिमीलाई थाहा छ | तिम्रो आगमन नभएको दिन मैले कति न्यास्रो मान्छु ? सों:च ! यदी तिम्रो माया नलागेको भए म प्रत्येक दिन भूकम्प ! भूकम्प ! भनेर पटक पटक चिच्याउने थिइनँ | सम्झ एकपल्ट |

सुन भूकम्प !  तिमीलाई म सानो यो चिठीमार्फत भन्दै छु | तिमीलाई पाउन मैले के गरिनँ ? मैले जे गुमाउनु थियो त्यो गुमाँइसकेको छु | अब त्यो भन्दा बढी गुमाउने म सँग केहि छैन | र अझैं पनि तिमीले मलाई माया गर्दैनस भनेर पटक पटक पीडा दिने गरेको छौ | अब मैले तिमीलाई म सँग बाँकी जति माया दिईसके | मलाई अझै तनाव नदेउ |

 सुन ! मलाई तिमीले तनाव दिदा तिमीलाई मनोरन्जन मिल्छ होला | तिमीलाई यो थाहा छैन कि तिम्रो तनावको असर मलाई मात्र पर्दैन | तिमीले गर्दा मैले धेरै आफ्नो भन्नेहरु गुमाएँ | त्यतिमात्र कहाँ हो र मैले बर्षौ बर्षबाट राखेको मेरो पुर्खाको सम्पति समेत निमिट्यान्न पारेँ | यो भन्दा ठुलो त्याग तिम्रोलागी अरु के हुन सक्छ ?

तिम्रो यादले मैले धेरै दिन भो निँन्द्रा पुग्ने गरि सुत्न नपाएको | तिमी किन मलाई सताउने गरि आकाशमा विजुली चम्केको जसरी दर्शन दिन आउँछौ | भूकम्प ! म भने तिमी कति बेला म संगै लामो समय बस्ने गरि आउँछौ भने तिमीलाई पर्खेर बसेको हुन्छु | तर, मलाई तिमी आएको या नआएको थाहै हुँदैन | किन ? यसरी सताउछौ |

किन ? भूकम्प मलाई तिमी पागल झैँ प्रत्येक दिन भूकम्प ! भूकम्प ! भनेर बोलाउन बाध्य बनाउछौ ?

हेर भूकम्प, जुन दिन तिमीलाई देखेँ र भित्र भित्रै मन पराउन थाले | त्यो दिन ५० केजीको थिएँ | तर, जब तिमीलाई मैले माया गर्ने थाले मैले आफ्नो ज्यान तिम्रो लागि भनेर ७ केजी घटाईसकेँ | सोच तिमीपनि मेरो स्थानमा बसेर |

मैले कति त्याग गरेको छु तिम्रो लागि | तिम्रो मायाले खाना समेत रुच्दैन | जब खाना खान बस्छु तिम्रो झ-झल्को देख्छु | म जब केहि काममा हुन्छु तिमीलाई झल्याँस्स सम्झन्छु |

तर भूकम्प अहिले आएर भने, मैले केहि फरक सोच्दै छु | त्यो हो तिमीसंँग छुट्टिनु | सुन, अब मलाई तिम्रो त्यो सुन्दर कोमल आनन्ददायी स्पर्श काँडा भएर बिझाउने भएको छ | यो मेरो कारणले हैन | तिम्रो धेरै मायाले गर्दा हो | मेरो दिमागमा यो कुरा घुस्यो कि भूकम्प अमृत पनि बिष भएजस्तै धेरै माया पनि अभिसाप बन्दो रैछ ! 

अहिले मलाई यस्तो लाग्दैछ | तिमीलाई माया गरेर मैले गल्ती गरेँ| तिम्रो हुने चाहनामा मैले धेरै गुमाउनु नपर्नेहरुलाई गुमाएँ | अब अझै गुमाउन चाहन्नँ |

 हो तिमीले गर्दा मैले धेरै ठक्कर खाएँ | त्यसैले, हो भूकम्प ! यो तिम्रो मायाले मलाई मात्र हैन करोडौँ मेरा आफन्तलाई समेत सताईरहेको छ , सिंगो नेपाल र नेपालीहरुलाई सताइरहेको छ । 

भूकम्प, अब यस्तो त्रासमय तिम्रो माया चाहिँदैन |

त्यसैले,

तिमी र म मिलेर डिभोर्स गरौँ | आउ, अदालत जाऔँ अनि तिमी आफ्नो बाटो जाऊ म आफ्नो बाटो लाग्छु !! हामी सँधैको लागि छुट्टिऔँ ,सँधैको लागि छुट्टिऔँ !!!                                                             

                                                उही तिम्रो हुन नसकेको मायालु                                                                                       पृथ्वी मनुवा ।