लर्ड्समा शक्तिको त्यो एक दिन !

                                                                                                                                                                                                                                                                                                                                

हरेक तीर्थयात्रीको एउटै सपना हुन्छ, आफ्नो धर्मको पवित्र स्थल पुगेर दर्शन गर्ने ।
धर्मको अर्थ कुनै अलौकिक तीर्थाटन होइन ।

क्रिकेटको कुरा चल्दा बेलायतको लर्ड्स क्रिकेट मैदानलाई पवित्र स्थलका रूपमा लिइन्छ । र, क्रिकेटको मक्का मानिने लर्ड्स मैदानमा केही समयअघि नेपालले पनि खेल्ने मौका पायो ।

टोलीमा थिए, नेपाली क्रिकेटको शक्ति मानिएका किफायती बलर शक्ति गौचन । दुई दशकदेखि नेपाली क्रिकेटमा जोडिएका गौचनले क्रिकेटको पवित्र स्थल लर्ड्समा खेल्न पाए र त्यो दिनलाई पवित्र र अवस्मरणीय क्षण बनाए ।

“हिन्दू धर्मावलम्बीले पशुपतिनाथलाई जसरी लिन्छन्, हामी क्रिकेटरले पनि लर्ड्सलाई त्यसरी नै लिन्छौं,” शक्ति भन्छन्, “हामी विश्व क्रिकेट लिग च्याम्पियनसिपअन्तर्गत नेदरल्यान्ड्ससँगको खेलको तयारीका लागि गएका थियौं । लर्ड्समा हामीले खेल्न पाउनु हाम्रा लागि जीवनकै अवस्मरणीय क्षण थियो ।”

हुन पनि लर्ड्स मैदानमा क्रिकेट खेल्न जो कोही खेलाडीले अवसर नै पाउँदैनन् । कतिपय खेलाडीको त त्यहाँ छिर्ने सपना पनि पूरा हुँदैन । अझ एसोसिएट राष्ट्र र त्यहाँका खेलाडीका लागि ‘आकाशको फल, आँखा तरी मर’ भनेजस्तै हो ।

नेपाल र ब्रिटेनबीच कूटनीतिक सम्बन्ध स्थापना भएको २ सय वर्ष पुगेको अवसरमा विश्वकै पुरानो क्रिकेट क्लब मेरिलिबोन क्रिकेट क्लब (एमसीसी)सँग लर्ड्समा नेपालले खेल्ने अवसर पाएको हो । लर्ड्समा खेल खेल्ने नेपाल एसोसिएट राष्ट्रको पहिलो टोली हो ।

लर्ड्समा भएको खेललाई शक्ति आफ्नो खेल जीवनकै एक अध्याय मान्छन् । भन्छन्, “नेपाली क्रिकेटमा मेरो १५ वर्ष बितिसकेको छ । लर्ड्समा खेल्ने सपनामात्रै देखेको थिएँ, पूरा भयो ।”

लर्ड्समा खेल्ने थाहा पाएदेखि नै शक्ति निकै उत्साहित थिए । खुलदुली पनि उत्तिकै थियो । “लर्ड्समा मैले निकै ‘इन्जोय’ गरें । कति पनि नर्भस भइनँ । मैदानमा पस्न भने निकै हतार भएको थियो,” उनले सुनाए ।

खेल्ने दिन मौसमले भने निकै सताएको थियो । मौसममा खराबी आएर वर्षा भएको भए नेपाली टोलीको लर्ड्समा खेल्ने सपना अधुरो हुने थियो । तर, मौसमले साथ दियो र नेपाली टोलीले ऐतिहासिक खेल खेल्ने मौका पायो । 

“बिहानैदेखि त्यहाँको मौसम नियालिरहेको थिएँ । तर, भगवान्को कृपाले पानी परेन,” शक्तिले त्यो दिनको स्मरण गरे, “उठ्नेबित्तिकै आज पानी नपरोस् भनेर भगवान शिवलाई गुहारेको थिएँ ।”

खेलपछि उनले मनमै भगवानलाई धन्यवाद दिए ।

आफू बसेको होटलबाट लर्ड्स मैदानमा छिर्दा नै शक्तिलाई विश्व नै जितेको अनुभव भयो रे ! उनले सन् २००४ मा भारतको वर्ली क्रिकेट क्लबबाट खेल्ने क्रममा बेलायत भ्रमणमा जाँदा लर्ड्समा खेल्ने सपना पालेका थिए । बाउन्ड्रीभन्दा बाहिरबाट लर्ड्स मैदान हेर्ने मौका पनि पाएका थिए । त्यसबेला उनलाई यहाँ खेल्न पाउने भाग्यमानी खेलाडी हुन्छु कि हुन्न भन्ने लागेको थियो ।

सन् १९८४ मा जन्मिएका शक्ति ३२ वर्षका भए । नेपाली खेलाडीहरूमा सबैभन्दा पाका बलर हुन् उनी । शक्तिसँगै खेलेका कतिपय खेलाडीहरूले खेलबाट सन्यास लिइसकेका छन् । त्यसैले पनि शक्ति आफूलाई भाग्यमानी ठान्छन् । “नेपाली टोलीमा ‘डेब्यु’ गरेको १५ वर्षपछि लर्ड्समा नेपालको झण्डाका साथ मैदान उत्रिन पाउने भाग्यमानी हुँ म,” गर्वका साथ भन्छन् शक्ति ।

पहिलो विकेट

शक्तिले सोचेका थिएनन्, लर्ड्समा पहिलो विकेट लिने खेलाडी बन्छु भनेर । शक्तिले बलिङ गर्नुअघि दुई बलरले बलिङ गरिसकेका थिए । तर, उनले एमसीसीको विकेट लिए र लर्ड्समा पहिलो विकेट हात पार्ने पहिलो खेलाडी पनि बने । नेपाली खेलाडीले दिएको चुनौती उनीहरूका ब्याट्सम्यानले सजिलै अघि बढाइरहेका थिए । लर्ड्सको पिच स्लो भएकाले त्यो स्पिनरका लागि उपयुक्त थियो ।

पहिलो ओभरमा विकेट लिन नसकेका शक्तिले दोस्रो ओभरमा ओपनर क्लार्कलाई बोल्ड गरेका थिए । विकेट लिएपछि शक्तिले आफ्नो पुरानै शैलीको सेलिब्रेट गरे । क्रिकेटको पवित्र स्थलमा विकेट लिने पहिलो नेपाली बनेको कुरा उनले जुनियर खेलाडीबाट थाहा पाएका थिए । शक्तिका लागि नेपाली टोलीको जित नै सबैभन्दा ठूलो कुरा लागेको छ । त्यो जीतको खुसी उनी शब्दमा व्यक्त गर्नै सक्दैनन् ।

लर्ड्समा खेलिरहँदा शक्तिको दिमागमा अनेकौं कुरा खेले । उनलाई विश्वकपको याद आइरहेको थियो । लर्ड्समा पहिलो विकेट लिने नेपाली खेलाडी बने पनि शक्तिले ब्याटिङ गर्न भने पाएनन् । उनलाई ब्याटिङ गर्ने चाहना पनि थिएन, किनकि आफूले ब्याटिङ गरेको अवस्थामा नेपाली क्रिकेटको कमजोर प्रदर्शन हुने उनी ठान्छन् ।

लर्ड्समा खेल खेलेपछि आफ्नो सपना साकार भएको भन्दै कतिपय खेलाडीले सन्यासको घोषणा पनि गर्छन् । शक्तिले पनि आफ्नो खेल जीवनको एउटा अध्याय सकिएको ठानेका छन् । तर, संन्यासको घोषणा भने गरेनन् । बरु अझै यस्ता ऐतिहासिक दिनको पखाइमा छन् । अझै दुई–चार वर्ष नेपाली क्रिकेटमा जम्ने उनको योजना छ । नेपाली टोलीको बलिङ सम्हाल्ने विचार छ । नयाँ खेलाडीले नेपाललाई धान्न सक्ने भएपछिमात्र संन्यास लिने उनले सुनाए ।

लर्डसमा एमसीसीसँगको मैत्रीपूर्ण खेल नेपालले ४१ रनले जित्यो । सबै खेलाडीको अनुहारमा चमक थियो । त्यो चमक जीतको मात्र थिएन, लर्ड्समा खेल्न पाएको खुसीको पनि थियो ।

साभार : बाह्रखरी